కొత్త బాధ్యతలతో జేడీ లక్ష్మీనారాయణ

స్టేట్ బ్యూరో పెన్ పవర్  హైదరాబాద్  ఫిబ్రవరి 17:

తెలుగు ప్రజలకు ప్రత్యేక పరిచయం అవసరం లేని పేరు వి.వి. లక్ష్మీనారాయణ. సీబీఐలో కీలక దర్యాప్తులతో జాతీయ స్థాయిలో గుర్తింపు పొందిన ఆయన ఇప్పుడు కార్పొరేట్ రంగంలో కొత్త బాధ్యతలు చేపట్టడం ఆసక్తికరంగా మారింది.

సీబీఐ దర్యాప్తులతో జాతీయ గుర్తింపు :  ఉమ్మడి రాష్ట్రంలో దివంగత ముఖ్యమంత్రి వై.ఎస్. రాజశేఖరరెడ్డి మరణానంతరం, అప్పటి రాజకీయ పరిణామాల మధ్య వై.ఎస్. జగన్‌మోహన్ రెడ్డిపై నమోదైన అక్రమాస్తుల కేసు దర్యాప్తు సమయంలో సీబీఐ జాయింట్ డైరెక్టర్‌గా లక్ష్మీనారాయణ కీలక పాత్ర పోషించారు. 2006–2013 మధ్య పలువురు ప్రముఖులపై హైప్రొఫైల్ కేసులు విచారించడం ద్వారా ఆయన పేరు దేశవ్యాప్తంగా ప్రాచుర్యం పొందింది. 1990 బ్యాచ్ మహారాష్ట్ర కేడర్ ఐపీఎస్‌గా సేవలందించిన ఆయన ముంబైలో అడిషనల్ డైరెక్టర్ జనరల్‌గా పదవీవిరమణ చేశారు.

విద్యాభ్యాసం – కార్పొరేట్ నుంచి పోలీస్ సేవల వరకు : ఎన్‌ఐటీ వరంగల్‌లో మెకానికల్ ఇంజినీరింగ్ బీటెక్ పూర్తి చేసిన ఆయన, ఐఐటీ మద్రాస్‌లో ఎంటెక్ సాధించారు. కెరీర్ ప్రారంభంలో అశోక్ లేల్యాండ్ ఆర్ & డీలో పనిచేసిన తర్వాత సివిల్ సర్వీసెస్‌లో ప్రవేశించారు.

రాజకీయ ప్రవేశం – ఆశలు, ఆవేదనలు : స్వచ్ఛంద విరమణ అనంతరం ఆయన రాజకీయాల్లోకి అడుగుపెట్టారు. 2019లో జనసేన పార్టీ తరఫున విశాఖపట్నం ఎంపీగా పోటీ చేసి ఓటమి చవిచూశారు. అనంతరం 2023లో ‘జై భారత్ నేషనల్ పార్టీ’ను స్థాపించారు. రాజకీయాలతో పాటు విశ్లేషకుడిగా, మోటివేటర్‌గా, సామాజిక కార్యక్రమాల్లో చురుకుగా పాల్గొన్నారు. తూర్పు గోదావరి జిల్లా ధర్మవరంలో వ్యవసాయం కూడా చేసి తన భిన్న కోణాన్ని చూపించారు.

ఈవీ ట్రాన్స్‌లో కీలక బాధ్యతలు : ఇప్పుడు లక్ష్మీనారాయణ హైదరాబాద్ కేంద్రంగా పనిచేసే EV Trans Private Limited సంస్థలో ఆపరేషన్స్ వైస్ ప్రెసిడెంట్‌గా బాధ్యతలు స్వీకరించారు. ఈ సంస్థ Megha Engineering and Infrastructures Limited అనుబంధ సంస్థగా పనిచేస్తోంది. దేశంలో అతిపెద్ద ఎలక్ట్రిక్ బస్ ఆపరేటర్‌గా గుర్తింపు పొందిన ఈవీ ట్రాన్స్, తెలంగాణ ఆర్టీసీ ఒలెక్ట్రా బస్సులు సహా ముంబై, పుణే, గోవా నగరాల్లో ఎలక్ట్రిక్ వాహనాల నిర్వహణలో భాగస్వామ్యం ఉంది. సంస్థ విస్తరణకు లక్ష్మీనారాయణ పరిపాలనా, నిర్వహణ అనుభవం తోడ్పడుతుందని నిర్వాహకులు ఆశాభావం వ్యక్తం చేస్తున్నారు.

వ్యక్తిగత జీవితంలో ఎదురుదెబ్బ : ఇదిలా ఉండగా, ఇటీవల ఆయన కుటుంబం ఆన్‌లైన్ ట్రేడింగ్ మోసానికి గురైన విషయం కూడా వెలుగులోకి వచ్చింది. రూ.2.58 కోట్ల నష్టం వాటిల్లిన ఈ ఘటనపై జనవరిలో సైబర్ క్రైమ్ పోలీసులకు ఫిర్యాదు చేశారు.

సర్వీసు నుంచి సర్వీస్‌కు – కొత్త దిశ : సీబీఐ దర్యాప్తుల నుంచి రాజకీయాల వరకు, ఇప్పుడు కార్పొరేట్ రంగంలో కీలక బాధ్యతల వరకు లక్ష్మీనారాయణ ప్రయాణం విభిన్న మలుపులతో సాగుతోంది. ప్రజాసేవలో గుర్తింపు పొందిన ఈ మాజీ ఐపీఎస్ అధికారి, ఎలక్ట్రిక్ మొబిలిటీ రంగంలో ఎలా ముద్ర వేస్తారో చూడాల్సి ఉంది.