పాపం… కొణతాల! మంత్రి ఆశలపై మళ్లీ చర్చలు

 బ్యూరో రిపోర్ట్ – పెన్ పవర్ విశాఖపట్టణం, ఫిబ్రవరి 17:

ఉత్తరాంధ్ర రాజకీయాల్లో మూడు దశాబ్దాలకు పైగా ప్రభావం చూపిన సీనియర్ నేత కొణతాల రామకృష్ణ మరోసారి చర్చనీయాంశంగా మారారు. ఒకప్పుడు జిల్లా రాజకీయాల్లో చక్రం తిప్పిన ఈ నాయకుడు, ఇప్పుడు మంత్రి పదవి కోసం ఎదురుచూస్తున్నారన్న ప్రచారం విశాఖ రాజకీయ వర్గాల్లో వినిపిస్తోంది.

రాజకీయ పయనం: ఎంపీ నుంచి మంత్రి వరకు : 1989లో తొలిసారిగా కాంగ్రెస్ పార్టీ తరఫున ఎంపీగా గెలిచి ఢిల్లీలో అడుగుపెట్టిన కొణతాల, అదే స్థానంలో రెండోసారి విజయం సాధించారు. 2004లో ఎమ్మెల్యేగా గెలిచి ఉమ్మడి విశాఖ జిల్లా నుంచి ఏకైక మంత్రిగా ఐదేళ్లు తన హవా కొనసాగించారు. ఆ సమయంలో జిల్లా రాజకీయాల్లో ఆయన మాటే చట్టంగా మారిందని అప్పటి రాజకీయ వర్గాలు గుర్తుచేసుకుంటున్నాయి. అయితే 2009లో ఓటమి ఆయన రాజకీయ గ్రాఫ్‌ను ప్రభావితం చేసింది. ఆ ఓటమి తర్వాత దాదాపు పదిహేనేళ్లు రాజకీయంగా ఎత్తుపల్లాలు ఎదుర్కొన్నారు. 2009లో గెలిచివుంటే రాజకీయ దృశ్యం వేరేలా ఉండేదన్న వ్యాఖ్యలు ఇప్పటికీ వినిపిస్తుంటాయి.

జనసేనలో కొత్త అధ్యాయం : 2024 ఎన్నికల నేపథ్యంలో పవన్ కళ్యాణ్ స్వయంగా ఆహ్వానించి టికెట్ ఇవ్వడంతో కొణతాలకు మళ్లీ ఎమ్మెల్యేగా అవకాశం దక్కింది. ప్రస్తుతం జనసేన పార్టీలో సీనియర్ మోస్ట్ లీడర్లలో ఆయన ఒకరుగా గుర్తింపు పొందుతున్నారు. ఉత్తరాంధ్ర రాజకీయాలపై పూర్తి అవగాహన, బీసీ సామాజిక వర్గానికి చెందిన నాయకుడిగా ఉన్న ప్రాధాన్యం దృష్ట్యా మంత్రి పదవి దక్కుతుందన్న అంచనాలు మొదటినుంచే వినిపించాయి. ముఖ్యంగా గవర సామాజిక వర్గానికి 25 ఏళ్లుగా మంత్రి స్థానం రాకపోవడం నేపథ్యంలో ఆ వర్గం నుంచి డిమాండ్ కూడా బలంగా ఉంది.

మంత్రి వర్గ విస్తరణపై ఊహాగానాలు : ఈ ఏడాది మధ్యలో మంత్రి వర్గ విస్తరణ ఉండొచ్చన్న ప్రచారం సాగుతోంది. జనసేనకు మరో మంత్రి పదవి దక్కితే అది కొణతాలకే ఖాయమన్న గుసగుసలు వినిపిస్తున్నాయి. ఉత్తరాంధ్రలో ఆ పార్టీ ఆరు ఎమ్మెల్యే సీట్లు గెలుచుకోవడం కూడా ఆయనకు అనుకూలంగా మారుతుందన్న విశ్లేషణలు ఉన్నాయి. అయితే మరోవైపు అదే పదవి కోసం నాగబాబు పేరూ వినిపించినా, ఒకే కుటుంబానికి పదవులు అన్న విమర్శల నేపథ్యంలో ఆ ఆలోచన వెనక్కి వెళ్లిందన్న చర్చ జరుగుతోంది.

బడ్జెట్ సభల్లో ప్రశంసల వర్షం : ఇటీవల అసెంబ్లీ బడ్జెట్ సమావేశాల్లో కొణతాల వ్యాఖ్యలు రాజకీయ వర్గాల్లో చర్చనీయాంశమయ్యాయి. ముఖ్యమంత్రి నారా చంద్రబాబు నాయుడుతో పాటు నారా లోకేష్, భువనేశ్వరి, బ్రాహ్మణి, దేవాంశ్ వరకు మొత్తం కుటుంబాన్ని ప్రశంసలతో ముంచెత్తారు. ఒకే కుటుంబంలో ప్రతిభావంతులే ఉన్నారని వ్యాఖ్యానించడం హాట్ టాపిక్‌గా మారింది. జనసేన ఎమ్మెల్యేగా ఉంటూ టీడీపీ నేతలకంటే ఎక్కువగా చంద్రబాబు కుటుంబాన్ని పొగడటానికి కారణమేంటన్న ప్రశ్నలు వినిపిస్తున్నాయి. మంత్రి పదవి ఆశలేనా? లేక రాజకీయ సమీకరణాలా? అన్నదానిపై ఊహాగానాలు జోరుగా సాగుతున్నాయి.

రెబల్ ఇమేజ్ నుంచి సాఫ్ట్ పొలిటిక్స్ వరకు? : గతంలో రెబల్ స్టార్‌గా పేరుపొందిన కొణతాల, ఎవరినీ పొగడని స్వభావంతో ఉండేవారని రాజకీయ పరిశీలకులు గుర్తుచేస్తున్నారు. అలాంటి నాయకుడు ఇప్పుడు ప్రశంసల జల్లు కురిపించడం వెనుక వ్యూహాత్మక ఆలోచనలున్నాయా అన్న చర్చ ఆసక్తికరంగా మారింది. అయితే మంత్రి పదవి ఇవ్వాలా వద్దా అన్నది పూర్తిగా పార్టీ అధినేత నిర్ణయమేనని, ఈ వ్యాఖ్యలను ఆ కోణంలో చూడటం సరికాదన్న వాదనలు కూడా వినిపిస్తున్నాయి.
ఉత్తరాంధ్ర రాజకీయాల్లో కీలక మలుపు? :  మొత్తానికి, కొణతాల రామకృష్ణ రాజకీయ ప్రయాణం మరో కీలక మలుపులో నిలిచిందని చెప్పవచ్చు. మంత్రి పదవి దక్కుతుందా? లేక మళ్లీ వేచి చూడాల్సిందేనా? అన్న ప్రశ్నకు సమాధానం రాబోయే రోజుల్లో తేలనుంది.