వరకట్న వేధింపుల విషాదం: మామను కొట్టిచంపిన అల్లుడు

వరకట్న వేధింపుల విషాదం: మామను కొట్టిచంపిన అల్లుడు,

 అతని తల్లిదండ్రుల అరెస్ట్ 

మహబూబాబాద్ పెన్ పవర్ డిసెంబర్ 13:

 వరకట్న వేధింపుల నేపథ్యంలో చోటుచేసుకున్న దారుణ ఘటనలో మామను కొట్టి చంపిన అల్లుడు సహా అతని తల్లిదండ్రులను పోలీసులు అరెస్ట్‌ చేశారు. ఈ విషయాన్ని మహబూబాబాద్ టౌన్ డీఎస్పీ ఎన్. తిరుపతి రావు శనివారం వెల్లడించారు. బోజ్య తండా, మర్రిగూడెం గ్రామం (గార్ల మండలం)కు చెందిన బానోత్ లాలూ నాయక్ మహబూబాబాద్ పాత కలెక్టర్ ఆఫీస్ ప్రాంతంలోని బాలాజీ హిల్స్‌లో నివాసం ఉంటున్నారు. ఆయన కూతురు శ్రీ సాయి లహరిని కురవి మండలం గుండ్రాతిమడుగు పెద్ద తండాకు చెందిన గూగులోత్ గాంధీబాబు (ప్రస్తుతం మిలిటరీ కాలనీ, మహబూబాబాద్)తో వివాహం చేశారు. వివాహం జరిగినప్పటి నుంచే అదనపు కట్నం, బంగారం తేవాలంటూ గాంధీబాబు తన తల్లిదండ్రులు, చెల్లితో కలిసి శ్రీ సాయి లహరిని శారీరకంగా, మానసికంగా వేధింపులకు గురి చేశారని పోలీసులు తెలిపారు. ఈ వేధింపులపై బాధితురాలు మహబూబాబాద్ టౌన్ పోలీస్‌స్టేషన్‌లో వరకట్న వేధింపుల కేసు నమోదు చేయగా, పెద్దమనుషుల సమక్షంలో సర్దుబాటు చేసి ఆమెను తిరిగి అత్తింటికి పంపారు. అయినప్పటికీ వేధింపులు కొనసాగడంతో పాటు కేసు వెనక్కి తీసుకోవాలని ఒత్తిడి తెచ్చినట్లు పేర్కొన్నారు. డిసెంబర్ 11న రాత్రి శ్రీ సాయి లహరిపై మళ్లీ దాడికి యత్నించగా, ఆమె వెంటనే తండ్రి లాలూ నాయక్‌కు సమాచారం ఇచ్చింది. దీంతో లాలూ నాయక్ తన కుమారుడు ప్రదీప్‌తో కలిసి మిలిటరీ కాలనీలోని నిందితుల ఇంటికి వెళ్లారు. అక్కడ గాంధీబాబు, అతని తల్లిదండ్రులు ముగ్గురు కలిసి లాలూ నాయక్, ప్రదీప్‌లపై మాకుమ్మడిగా దాడి చేశారు. తీవ్ర గాయాల పాలైన లాలూ నాయక్ డిసెంబర్ 12న తెల్లవారుజామున చికిత్స పొందుతూ ఆసుపత్రిలో మృతి చెందారు. ఈ ఘటనపై మృతుడి కుమారుడు ప్రదీప్ ఇచ్చిన ఫిర్యాదు మేరకు మహబూబాబాద్ టౌన్ ఇన్స్పెక్టర్ జి. మహేందర్ రెడ్డి కేసు నమోదు చేసి, 24 గంటల్లోనే నిందితులను అరెస్ట్ చేసి కోర్టులో హాజరుపరిచారు. వేగంగా దర్యాప్తు పూర్తి చేసిన టౌన్ ఇన్స్పెక్టర్, టౌన్ ఎస్సై ఎస్‌కే షకీర్‌ మరియు సిబ్బందిని డీఎస్పీ ఎన్. తిరుపతి రావు అభినందించారు.

అరెస్ట్ అయిన నిందితులు:

1. గూగులోత్ గాంధీబాబు (30) – సీతారాం కుమారుడు

2. గూగులోత్ సీతారాం (56) – రాంచంద్రు కుమారుడు

3. గూగులోత్ కవిత (50) – సీతారాం భార్య

 నివాసం: మిలిటరీ కాలనీ, మహబూబాబాద్; స్వస్థలం: పెద్ద తండా, గుండ్రాతిమడుగు, కురవి మండలం